Júdó

Júdó er ólympísk einstaklingsíþrótt, upprunnin frá Japan, sem var sett á stofn undir lok 19. Aldar. Íþróttin samtvinnar vopnlausa bardagaaðferð sem byggist á glímu og strangt siðferði sem byggir á japönskum hefðum og heimspeki íþróttarinnar. Tilgangurinn með júdó er tvíþættur: að styrkja líkamann með styrktaræfingum og glímu ásamt því að vinna að stöðugum bætingum í eigin fari með því að þjálfa hugann. Júdó er vinsæl íþrótt um allan heim og státar af yfir 40 milljón iðkendum með júdósambönd í 206 löndum.

Íþróttin júdó

Júdó er sjálfsvarnarlist sem leggur áherslu á að nota hraðvirkar hreyfingar og vogarafl til að kasta mótherja. Tækni er notuð til þess að snúa krafti mótherja í eigin hag frekar en að mæta honum með afli. Þannig nýtist kraftur mótherja gegn honum sjálfum. Glímuíþróttin virkar vel sem sjálfsvörn og læra iðkendur að verja sig án þess að meiða andstæðinginn. Æfingar eru gerðar til þess að byggja upp líkamlegan styrk og þrek og þar að auki eru iðkendur þjálfaðir í júdóglímum. Júdó er að mörgu leyti ólík öðrum bardagaíþróttum sem nota margvísleg bein högg en júdó líkist frekar glímu. Áherslan er á að stjórna hreyfingum og halda jafnvægi í stað þess að lenda höggum á andstæðing. Mikil áhersla er lögð á að iðkendur læri að detta rétt og nýtist það innan íþróttarinnar til þess að lenda rétt þegar verið er að henda iðkendum með júdóköstum en það nýtist einnig utan júdóæfinga þar sem iðkendur læra að beita sér rétt ef þeir detta skyndilega, til dæmis í hálku. Fyrst og fremst snúast fallæfingar um að vernda höfuðið og líkamann og geta slíkar æfingar geta því komið í veg fyrir meiðsli utan æfinga. 

Heimspeki júdó

Júdó merkir bókstaflega „hinn mjúki vegur“ og heimspeki íþróttarinnar má kjarna með tveimur setningunum: „hámarks skilvirkni með lágmarks fyrirhöfn“ og „gagnkvæm velferð og ávinningur fyrir alla“. Í Júdó er lögð mikil áhersla á að byggja einstaklinga upp andlega ekki síður en líkamlega. Æfingar byggja upp líkamlega þáttinn en japanskar hefðir og siðareglur íþróttarinnar byggja upp andlega þáttinn sem einkennist af aga, gagnkvæmri virðingu og hugarfari þess efnis að iðkandinn ætli að gera betur í dag en í gær. Iðkendur þjálfast í að stjórna tilfinningum sínum og hvötum með því að læra þrautseigju, virðingu, hollustu og aga. Börn sem æfa júdó þróa ekki einungis með sér líkamlega færni og íþróttamennsku heldur einnig gott siðferði, mannasiði og velsæmisreglur. Heimspeki íþróttarinnar er þéttofin inn í alla þætti hennar, allt frá samskiptum á æfingu yfir í keppnir og utanumhald.

Keppnis júdó

Hér fyrir neðan má sjá myndband sem fer hratt yfir reglurnar í júdó keppni.

Hér eru nokkur flott köst úr júdókeppni. Athugið að keppendurnir eru búnir að æfa í mörg ár og hafa lært að lenda án þess að meiða sig.