Hin mjúka leið

Júdó er japönsk ólympíuíþrótt þar sem iðkendur læra fjölbreytta tækni, hreyfingu og að vinna með æfingafélaga. Í júdó eru engin högg eða spörk – meðal annars er æft að kasta, halda og falla á öruggan hátt.

Júdó hentar börnum með ólíkan bakgrunn og mismunandi líkamlega getu. Engin fyrri reynsla er nauðsynleg til að byrja.

Hvernig er júdóæfing?

Æfingar eru fjölbreyttar og lagaðar að aldri og reynslu iðkenda. Á barnaæfingum blandast saman leikir, hreyfing, fallæfingar, júdótækni og æfingar með félaga.

Áhersla er lögð á að börnin læri smám saman, hafi gaman af æfingunum og fái að þróast á sínum hraða.

Hvað læra börnin?

Í júdó læra börn meðal annars jafnvægi, samhæfingu, hreyfifærni og fjölbreytta júdótækni. Þau læra að kasta, halda og vinna með hreyfingar og jafnvægi æfingafélaga.

Mikilvægur hluti júdós eru fallæfingar. Þar læra iðkendur að falla og lenda á öruggan hátt. Sú færni nýtist ekki aðeins á júdóæfingum heldur getur einnig komið að góðum notum í daglegu lífi. 

Er júdó öruggt?

Öryggi er mikilvægur hluti af júdóþjálfun. Fallæfingar eru meðal þess fyrsta sem nýir iðkendur læra og tæknin er kennd stig af stigi.

Æfingar eru lagaðar að aldri og getu iðkenda og lögð áhersla á öruggt og jákvætt æfingaumhverfi.

Hvað þarf á fyrstu æfingu?

Það þarf ekki að eiga júdógalla til að koma og prófa.

Þægileg íþróttaföt, til dæmis joggingbuxur og bolur, duga vel til að byrja með. Æft er berfætt á júdódýnum.

Ef ákveðið er að halda áfram að æfa er hægt að fá upplýsingar hjá félaginu um júdógalla og annan búnað.

Belti og framfarir

Iðkendur vinna sig smám saman áfram í júdó og fá ný belti eftir því sem færni og reynsla eykst. Beltin eru ein leið til að sýna framfarir og gefa iðkendum markmið til að vinna að.

Hver iðkandi fær að þróast á sínum hraða.

Þarf að keppa?

Nei. Það er ekki nauðsynlegt að keppa til að æfa júdó.

Þeir sem hafa áhuga á keppni geta tekið þátt í mótum eftir því sem þeir öðlast reynslu, en það er líka hægt að æfa júdó án þess að keppa.

Keppnisjúdó

Hér fyrir neðan má sjá stutt myndband sem útskýrir hvernig keppt er í júdó.

Langar þig að prófa júdó?

Nýir iðkendur eru velkomnir í hópana okkar í Urriðaholti og á Sjálandi. Engin fyrri reynsla er nauðsynleg og það er hægt að koma og prófa.